ശിവമുരുകാ

ശിവമുരുകാ



ഹരോ ഹര ഹരോ ഹര ഹരോ ഹര ഹരോ ഹര
ഹരോ ഹര ഹര സുതാ ശിവമുരുകാ

ശരവണ ഭൂജാതനേ ശരണാഗത വത്സലാ
ശരണദായകാ ശുഭ ശിവമുരുകാ

രണ രംഗ സുശോഭിതാ രമണീയ കലാധരാ
രമിത വിബുധലോക ശിവമുരുകാ

വരണീയ സുചരിതാ വരശീല ഗുണാര്‍ണ്ണവാ
വല്ലിതന്റെ കാന്തനായ ശിവമുരുകാ

നത ജന പരി പാല നഗഹര സുരവര
നമിതസുരസഞ്ചയ ശിവമുരുകാ

ഭവസുത ഭവ ഹര ഭജനീയ സുപാലകാ
ഭദ്രാചലേശ്വരാ ഹര ശിവമുരുകാ

വന്ദനീയ ചാരു മൂര്‍ത്തേവാരണമുഖ സഹജാ
വരദാനശീലാ വര ശിവമുരുകാ

അന്തകാന്തകാത്മജാസ്സുവന്ദിത മുനിസഞ്ചയ
മന്ദഹാസ സുശോഭിതാ ശിവമുരുകാ

ആദിവിനായകാനുജാ ആരണ കുലപാലകാ
അഴണമേ നിന്മഹസ്സില്‍ ശിവമുരുകാ

മാനസവാനില്‍

ശ്രീയെഴും ശ്രീ കാര്‍ത്തികേയദേവാ

ശ്രീ നാഥപൂജിതാ ശ്രീമുരുകാ

ശ്രീവള്ളിദേവിതന്‍ പ്രാണനാഥാ

ശ്രീ ബാഹുലേയാ നമിയ്ക്കുന്നു ഞാന്‍

കൈലാസ നാഥന്ന് മോദമേകും

ശൈലജയ്ക്കാനന്ദ സിന്ധുവല്ലോ

വൈരിജനത്തിന്നു ഖേദമേകും

താ‍രകാരാതിയ്ക്കു കുമ്പിടുന്നേന്‍

ജ്ഞാനപ്പഴമെന്നു കീര്‍ത്തിയേറും

ഞാനമഹാനിധേ ശ്രീ കുമാരാ

അഞാനമോഹവിനാശനാ തേ

വിഞാനമേകുവാന്‍ കുമ്പിടുന്നേന്‍

ഭേദങ്ങളില്ലാത്ത ചാരുമൂര്‍ത്തേ

കാര്‍ത്തികദേവിമാര്‍ക്കിഷ്ടമൂര്‍ത്തേ

വേദവിത്തുക്കള്‍ക്കാനന്ദ മൂര്‍ത്തേ

ചാരുകീര്‍ത്തേ നിന്നെക്കുമ്പിടുന്നേന്‍

വിഘ്നരാജന്‍ ഗണനായകന്റെ

വീരനാം സോദരാ കാര്‍ത്തികേയാ

വേലും ധരിച്ചിട്ടു ചേലിലെന്റെ

മാനസ വാനില്‍ വിളങ്ങണേ നീ

ശാശ്വതഭക്തി വളര്‍ന്നു ചിത്തേ

ശാശ്വത ശാന്തിയുണര്‍ത്തിടുന്ന

ശാശ്വത നാമജാലങ്ങള്‍ പാടാന്

‍ശക്തിനല്‍കീടണം ശംഭുസൂനോ

ശംഭുകുമാരകാ ശക്തിധാരിന്‍

ശൂരസംഹാരകാ ശ്രീവിശാഖാ

ശോകങ്ങളൊക്കെയും തീര്‍ത്തുകൊള്‍വാന്‍

ശാശ്വതമൂര്‍ത്തേ നമിച്ചിടുന്നേന്‍

സച്ചിദാനന്ദ സ്വരൂപനാകും

ഷണ്മുഖാനിന്നുടെപാദസേവ

എന്നുമേയേകിയനുഗ്രഹിയ്ക്കു

ശങ്കരനന്ദനാ തേ നമസ്തേ